لملم عيالك.. وسيبنا .. قصيدة جديدة للشاعر الشعبي المصري فؤاد نجم

كأنك مفيش
برغم إن صورك فـ كل الدواير
وكل المداخل وكل المحاور
ومليا الشوارع على كل حيط..
مطنش علينا وعامل عبيط..
كأنك مفيش..
***
يا فرحة قلوبنا رئيسنا ظريف..
فُكهي..
إبن نكته ودمه خفيف
فـ عهدك سيادتك فَرَشنا الرصيف
وآخر مُنانا الغُموس والرغيف
وكل أمَّا تُخنُق ندوَّر ..
مفيش !!
***
مسيِّب علينا عصابة حبايبك
فضايح وسرقة ونهب بسبايبك
مابين حزب نجلك... وهانم جلالتك
وجيش الغوازي إللَّي داير يجاملك
وناملك وقاملك... وحارسك وأمنك
شبعنا مهانه... شبعنا لطيش..!
وأنت .. مفيش!!
***
باعونا فـ حضورك..
ببركة عِبـيدك وغالي وسرورك
باعوا الأراضي .... وكل المصانع
وباعوا البنوك..
وقدَّام عِنيك.. صوتنا إتـنبح..
ننادي عليك..
إلحق يا ريس: ده باعوا الحديد!!
وأنت منشِّف دماغك عنيد!!
.. كأنك مفيش !!
***
دوشتوا دماغنا «بجمال» طلعتك
ومن يومها وإحنا عَبـيد حضرتك
ما تزعلش إني مواطن أبيح
ورافض كلابك فـ شعبك تطيح
فسادهم يا ريِّس واضح.. صريح
قوم بينا صلّح وفتَّش.. وثور
ح نكتب تاريخك ياريِّس بنور
مش تبقى عايش كأنـَّك مفيش!!
***
ورحمة أبوك.. مادام أنت قاعد
عيب لمَّا عُصبة نَـوَر يسحبُوك
م تُقبض عليهم.. م تقطع إيديهم..
م تعمل عليهم يا ريِّس شاويش
بدل م انت ساكت وقاعد مفيش
***
ياريس عليّ الطلاق تعبانين!
ياريس عليّ الحرام كفرانين!
صبرنا سنين..
سيادتك مسلطن
وشعبك وناسك بتاكل مسرطن
وتشرب مجاري وميت سم هاري..
ومش دريانين!
ما تنهض يا ريس تلم الديابه؟!
ده شعبك غلابه..
ومليان طيابه..
وهوَّ الشفاعة ف يوم الحساب
وهما البطانة الحُثاله الكلاب
ما يملاش عنيهم غير التراب
وليهم ظوافر
وميت ألف ناب
وواقفين لشعبك ورا كل باب
لإمتى ح تسكت وليه الغياب؟
ده ياما ممالك طواها التراب
حياتنا ياريس تعب فوق عذاب
ياريس «شريفك» ماهوّاش شريف!
«نظيفك» يا ريس ماهوّاش نظيف!
وحتى «حبيبك» ماهواش حبـيب!
وأنا غصب عني.. خلاص استويت..
بـ غـُلبي انحنيت..
وطلعان عنيا.. وصعبان عليا
بحسبة بسيطة ومن غير خريطه..
وكونك مفيش.. لقيت متساويش
ومش فارقه أعيش..
نويت أشتكيك للِّي فوقي وفوقك
وأصلي الفرايض.. عسى يفـُك طُوقك
قالولي إللي يسجد عدو النظام!
حاولت أحكي حالي..!
قالولي الحكاوي نميمة وحرام!
فكرت أكتب..
لقيتكم سيادتك منعتوا الكلام!
فقررت أحلم..
** **
هاحلم سيادتك وأفك اللجام
ولو مش هيعجب سيادتك يا فندم
وصِّ العساكر.. تاخُدني امَّا انام!
***
حلمت اني شعب..!
حلمت اني شعب ومصلوب بطولي
على ارض سمرا
ودمي بينزف ومليان جروح
وفوق صدري جمرة
يميني مربّط على ارض طابا
شمالي ممسمر فـ «اولاد علي»
ورجلي على جزع نخلة فـ «حلايب»
ومرتاح براسي على حِجْر مصر
وشوفتك يا ريس.. كأنك ولي..
كأنك نبي..
فـ إيدك عصاية وليك معجزات
وشايل صليبي وبتفُكني..
وانا فـ جنَّة خضرة.. وتحتي جداول..
ومن فوقي نور.. وريحة بخور..
همست فـ ودانك بآخر وصيّة:
انسَ اللي فاتك..
هننسى الاسية..!
امانة عليك..
حُط الوطن جُوَّه نِنِّي عينيك
كرامة عيالنا امانة فـ ايديك
بحق اللي بينّا يا ريس وبـينك
وحَق اليَمين و«االكتاب» في يمينك
بحق الشهيد.. اللي رافع جبينك
وجيش انتصارك في يوم العبور
وجيل حُر طالع.. وعدته بدور
لملم عيالك.. وجمَّع فـ مالك
واسحب «جمالك» وسيبنا وغور